اولاً انا وزني متوسط وعاجبني وماعندي نية انزله
لكن كان يضايقني وجود الذقن المزدوج (خفيف) لو نزلت وزن راح لكن انا مثل ماقلت مابي انزل وزني
بحثت كثير كثير واخيراً اخترت دكتور سعودي
رحت موعد استشاره فحص جلدي وقال بما ان عمري صغير والجلد مرن ف انا ما احتاج الا شفط ذقن بالفيزر بدون شد
اخترت ان البنج موضعي
يوم العملية /
تسبحت (لان ٣ ايام الى ٤ايام ممنوع افك المشد نهائياً)
رحت وانا صايمه ٨ ساعات
اشيل كامل ملابسي ولبسوني لبس العمليات كاملاً
جاء الدكتور وخطط وجهي بقلم
والنيرس وعقمت وجهي ورقبتي وجزء من صدري
جاء الدكتور حقن ذقني بابرة البنج (الم شكة الابرة فقط) ما اخذ وقت بعدها دقيقه ماعاد احس باي الم برقبتي وبداء يشتغل
حقني بسائل وصارت رقبتي مشدوده وثقيله (بدون الم)
فتح لي ٣ فتحات تحت الذقن وتحت الاذنين الثنتين
وهو يشتغل كان احد يمسج مساج قوي يضايق لكن (غير مؤلم ) في قرصات الم خفيفه جداً ولكن لا تذكر اصنفها على مقياس من ١٠ (٤ من ١٠)
اخذ الاجراء من بدايته تقريباً ٢٠ دقيقه مو اكثر
خلص الاجراء وخيط الفتحات
وجلست واستغربت ذقني صار اكبر من قبل !
على اني اشوف الصور دايم قبل وبعد يكون النتيجة واضحة لكن انا العكس !
المهم حسيت اني دايخة شوي مالي خلق اتكلم
طلعت
ملاحظة(ماتقدرين تسوقين لان فيك دوخة البنج وماتقدرين تلتفتين التفاتات قوية )
اعطاني الدكتور مسكن سولبادين كل ٦ ساعات ل٣ ايام ثم عند الحاجة
ومضاد زينات كل ١٢ ساعه ٥ ايام
النومة كانت صعبة وماقدرت انام زين بسبب المشد ولان لازم انام على ظهري ممنوع انام على اي جنب
الاكل كان صعب جداً فكي يوجعني ومقدر افتح فمي كثير
اليوم الاول بعد العملية
كان وجهي وارم مرررة وخدودي وفكي يوجعني حاولت اكل اشياء لينة شوربة زبادي وهكذا وكان لازم اخذ المسكن كل ٦ ساعات لان فيه الم خفيف
تركيزي مشوش شوي.
اليوم الثاني بعد العملية
وجهي اقل تورم ب٣٠٪ عن اليوم الاول فكي لازال يوجعني والاكل لازال صعب ظهري ورقبتي صارو يوجعوني لان انام على ظهري طووول الليل
تركيزي افضل بكثير من امس
فتحت المشد ٥ دقايق وشكل الذقن ماتغير
اليوم الثالث بعد العملية
الحمدلله خف التورم
اليوم السادس بعد العملية بديت جلسات مساج لمفاوي يدوي بالعيادة حجزت بكج ١٠ جلسات
في عيادة ريفلكت كانت ال ٥ جلسات ب٧٥٠ ريال
كنت اروح يوم ايه ويوم لا وبعدين يومين يوم
الدكتور نصحني بعد الشهر ممكن احتاج جلسات ال بي جي او اكسلز حسب التورمات اذا راحت او لا
شهر بعد العملية
التغيير بسيط جداً (لان اساسا الذقن كان بسيط عندي)
فيه الم بسيط في منطقة الذقن عند اللمس
الدكتور يقول بعد ٣ أشهر يبان النتيجة النهائية وانتظر ال٣ اشهر واقولكم
دعواتكم
هذي كانت تجربتي حبيت انقلها للفائدة
اكتبو تجاربكم تحت
(ماراح اقول اسم الدكتور الا بعد ٣ شهور اذا شفت نتيجة علشان ما اورط احد )
duy
عضو جديد