لكل من ناوي يشتري بيت أو يعمّر.. هذي خلاصة تجربة سنين، حبيت أشاركها لعل أحد يستفيد منها:
أول خطوة: صلّ استخارة
والله ما يخيّب من استخاره، خاصة في مشروع كبير مثل البيت، العمر ينحط فيه.
ثاني خطوة: حدد أولوياتك اللي ما تتنازل عنها
قبل ما تدخل بتفاصيل التصميم أو المقاول، اجلس مع نفسك أو مع أهلك، واكتب النقاط الأساسية:
من ناحية التخطيط:
أقل عدد غرف يناسبكم؟ تبغون مجلس رجال بدورة مياه مستقلة؟ فيه مساحة مستقبلًا للمطبخ الخارجي أو لا؟
من ناحية المواد:
وش نوع العازل المائي؟ العازل الحراري؟ نوع البلوك؟ التمديدات الكهربائية؟ العمالة؟
من ناحية التوسع المستقبلي:
هل فيه مجال تضيف غرفة، ملحق، خيمة، مسبح؟ وهل التصميم يسمح تفتح غرف على بعض بدون ما توقفك أعمدة وسط الجدار؟
ثالث خطوة: لا تعتمد على الكلام، عاين بنفسك
حتى لو البيت جديد أو شكله نظيف، لا يغنيك عن زيارة الموقع أكثر من مرة، في أوقات مختلفة، ويفضّل بأيام فيها مطر.
لاحظت من خلال بحثي الطويل بعض المشاكل المتكررة:
بعض البيوت تُقفل وقت المطر لأن فيها تسريب مويه.
بيوت تجارية كثيرة فيها تفاصيل ما تطلع إلا بعد ما تسكن:
الأفياش قليلة، عشان المقاول يوفّر.
انحدار الأرضيات غلط، خصوصًا بالمطبخ أو الحوش، يخلي المويه تتجمع بعيد عن تصريف المجاري.
سور البيت أو السطح منخفض، وهذا خطر على الأطفال ويقلل الخصوصية.
مافيه أساس قوي للأحواش، وبعد كم سنة تبدأ تهبط وتتشقّق.
💬 تجربتي الشخصية
أنا دورت على بيت جاهز ثلاث سنوات، ما لقيت شي يرضيني أو يناسب احتياجي، وفي النهاية توكلت على الله وأخذت أرض وبنيتها بنفسي. أخذ مني البناء خمس سنوات، والحمد لله على فضله وكرمه.
نصيحتي لكل واحد مقبل على هالخطوة: لا تستعجل، ولا تفرّط في أولوياتك، وخلّ عينك على التفاصيل الصغيرة.. لأنها هي اللي تعلّمك بعدين.
الله يوفق الجميع ويكتب لكم من واسع فضله 🌿
اكتبو تجاربكم تحت وخلوها مرجع للي يبي يشتري او يبني
mim
عضو جديد